എൺമകജെ
ഗ്രാമ പഞ്ചായത്ത്

ചരിത്രവും വികസനവും – എൺമകജെ ഗ്രാമപഞ്ചായത്ത്

എൺമകജെ ഗ്രാമപഞ്ചായത്ത് 1953-ലാണ് രൂപീകൃതമായത്. ആദ്യകാലത്ത് മൈറെ ഗ്രാമത്തിന് പ്രത്യേകം പഞ്ചായത്ത് ബോർഡും എൺമകജെ, കാട്ടുകുക്കെ, പദ്രെ ഗ്രാമങ്ങൾ ഉൾപ്പെടുത്തി എൺമകജെ ഗ്രാമപഞ്ചായത്തും പ്രവർത്തിച്ചു വരികയായിരുന്നു.

1953 മുതൽ മൈറെ പഞ്ചായത്ത് ബോർഡിന്റെ യോഗങ്ങൾ ഷേണി ശാരദാംബ സ്കൂളിൽ ചേർന്നിരുന്നു. അന്നത്തെ സാഹചര്യത്തിൽ പഞ്ചായത്തിന് സ്വന്തമായി ഓഫീസ് കെട്ടിട സൗകര്യം ഉണ്ടായിരുന്നില്ല. പഞ്ചായത്ത് ബോർഡിന്റെ അധ്യക്ഷനായി വൈ. കൃഷ്ണഭട്ട് കൊഡ്യാലമൂല പ്രവർത്തിച്ചപ്പോൾ ദോട്ടദൊമനെ, ലിങ്കണ്ണ നായക്, കയോടി ദേവപ്പനായക്, ഷേണി കൊറഗപ്പ റൈ, വൈ. വെങ്കപ്പ ഭട്ട്, ഷേണി സുബ്ബണ്ണ ആൾവ, ജനാബ് ജി. അബ്ദുള്ള ബ്യാരി എന്നിവർ അംഗങ്ങളായിരുന്നു.

1951 മുതൽ ശ്രീ. ശങ്കരഭട്ട് എൺമകജെ ഗ്രാമപഞ്ചായത്തിന്റെ അധ്യക്ഷനായിരുന്നു. കെ.എസ്. ഗോവിന്ദഭട്ട്, പി. വെങ്കടരമണ ഭട്ട്, എസ്. വെങ്കടരമണ ഭട്ട്, എം. നാരായണശാസ്ത്രി, പി. സുബ്ബ ഭൈര, ഐത്ത ബളഗെ എന്നിവർ ഭരണസമിതിയിലെ അംഗങ്ങളായി പ്രവർത്തിച്ചു.

കലാ–സാംസ്കാരിക പൈതൃകം

കലാ–സാംസ്കാരിക രംഗത്തും എൺമകജെ ഗ്രാമപഞ്ചായത്ത് തന്റേതായ വ്യക്തിമുദ്ര പതിപ്പിച്ചിട്ടുണ്ട്. ഷേണി ഗോപാലകൃഷ്ണ ഭട്ട്, വിദ്വാൻ പെർള കൃഷ്ണഭട്ട്, പദ്രെ ചന്തു, അട്ക്കസ്ഥല നാരായണ റൈ, ബലിപ നാരായണ ഭാഗവതർ, കാട്ടുകുക്കെ അയ്യപ്പ മണിയാണി, അട്ക്കസ്ഥല സഞ്ജീവ റൈ തുടങ്ങിയ മഹാന്മാരെ സ്നേഹാദരപൂർവ്വം സ്മരിക്കുന്നു. യക്ഷഗാന കലയുടെ വളർച്ചക്കും ലോകപ്രശസ്തിക്കും അവർ നൽകിയ സംഭാവനകൾ അതുല്യമാണ്.

വിവിധ മതവിഭാഗങ്ങളിൽപ്പെട്ട ജനങ്ങൾ ഇവിടെ സമാധാനത്തോടെയും സൗഹാർദ്ദത്തോടെയും ജീവിച്ചുവരുന്നു. ഓരോ മതവിഭാഗങ്ങൾക്കും സ്വന്തം ആരാധനാലയങ്ങളുണ്ട്. പരസ്പര ബഹുമാനവും വിശ്വാസവും സഹവർത്തിത്വവും ഈ നാടിന്റെ പ്രത്യേകതയാണ്.